عين العرب عين العروبة ترعاك – ريزان حدو

المذيع : المناضل في مجال حقوق الإنسان ، الثوري الأكاديمي الأستاذ ثوري المرتكي مرحباً بك واسمح لي أن نبدأ مباشرة بالحوار السؤال الأول :
شو أكتر شغلتين بتكرهن ؟
ثوري المرتكي : بكره العنصرية و كوباني !
المذيع السؤال الثاني : شو أكتر شغلتين بتحبن ؟
ثوري: الأولى حقوق الإنسان من حرية و مساواة و إخاء و تقرير المصير و … و …
و الشغلة التانية يللي بحبها هي عين العرب !!
الصحفي : بس يا أستاذ ثوري المرتكي عين العرب نفسها كوباني .
ثوري المرتكي : لاء لاء لاء عين العرب هي عين العرب .
المذيع : بس ما بتشوف أنو هي عنصرية كوباني هو الإسم الأصلي لعين العرب .
ثوري المرتكي : لاء مطلقا ماهي عنصرية فنحن عندما نقول عين العرب يعني يا عين العرب لا تخافي فعين العروبة ترعاك .
المذيع : طيب ممكن يقول أحدهم تعال لنسمي شبه الجزيرة العربية بشبه الجزيرة الكوردية مشان عين الكوردياتية ترعى شبه الجزيرة العربية !! بكل الأحوال معنا اتصال من كوباني (عين العرب ) المواطن شيركو تفضل يا أخي .
شيركو : سؤال للسيد ثوري هلق عين العروبة يللي رح ترعى كوباني هي نفسها عين العروبة يللي رعت ومازالت ترعى فلسطين و لبنان و العراق و الصومال و جيبوتي و السودان و ليبية .
ثوري المرتكي : أكيد نفسها مافي فرق مطلقاً عنا بين الصومال و فلسطين و عين العرب .
شيركو : نفس العين قلتلي ما هيك !؟
إذا عين العروبة رح ترعى كوباني ( عين العرب ) متل ما رعت فلسطين إي و الله لنكيف و بالمخيمات رح نشتي و نصيف .
ثوري المرتكي بغضب : و شو يللي زاعجك بعين العروبة ؟ بدك عين الإمبريالية و الصهيونية و الرجعية ترعى عين العرب ما هيك .
شيركو : أستاذ ثوري بدي عيون السوريين ترعى كوباني
و إيد السوريين تساعد كوباني
و لسان السوريين يتعود على لفظ كلمة كوباني