ليش في أذكى من اللبناني؟ – دينا رفيق الحجار

ليش في أذكى من اللبناني ؟ منبلش أول مايخلق اللبناني …

أول مايحكي اللبناني مابقول متل بقية الأولاد ماما أو بابا. اللبناني أول مايحكي بيكون بيعرف بالجمل والإعراب وبركب من أولتها الجملة الشهيرة الخاصة بلبنان: “اجت الكهرباء وراحت الكهرباء”.




الطفل اللبناني بس يتخرج من الحضانة بيأخد أول وأهم شهادة من بين كل الشهادات الباقية: شهادة قواص وفرقاع …

الطفل اللبناني بس يسمع انفجار مابيخاف متل بقية الأولاد… الطفل اللبناني بيقول “بوم”!

مين قال أنه اللبناني مش شاطر بالمدرسة… للشطارة كذا معيار ومعيار اللبناني هو شطارة الغش…

مين قال أنه الجامعة هي بس صفوف وشهادة لللبناني ؟ الجامعة صارت  كمان برنامج  “كلام الناس” بس بلا كلام ومع شعار”اصنع الحدث” وربورتاجات مباشرة من قلب الحدث…

مين قال أنه اللبناني مابيعرف يستفيد من العجقة … اللبناني بيتعلم اليوجا والصبر بالعجقة…

مين قال أنه اللبناني مابيعرف بالرياضة؟ اللبناني بيركض تياكل وبيلعب ملاكمة على صندوق السوبرماركت وبيشوطو مثل الطابة وقت يكون بده معاملة حق بالدوائر وكل لبناني معه دفتر سواقة بيكون شوفير رالي حتى لو معه فورد ابو دعسة …

مين قال أنه اللبناني  مابيعرف يدبر حاله؟ شبكة الكهرباء ما فيها كهرباء قام اللبناني علّق… شبكة المياه مافيها مياه قام اللبناني علّق…  صار حادث سير قام اللبناني مسك التليفون وصوّر الحادث وحطو عالفيسبوك مع تشك إن / check-in بركي الخبير كان أونلاين تيلاقيله …

مين قال أنه اللبناني مابيعرف يعمّر بنى تحتية متينة؟ اللبناني ذكي وإقتصادي: عمل البنى التحتية مثلاً تيكون كل نفق بلبنان بيلعب دورين: نفق سير بالصيف وسد مياه بالشتي… بعدين بالشتي البنى التحتية عم تغني لبنان بالمياه : بالإضافة أكيد للليطاني والعاصي والكلب والجوز والكبير إلخ… صار عنا 156 نهر جديد : نهر الدورة ، نهر المطار ، نهر الاشرفية ، نهر صيدا إلخ…

اللبناني وحده بيعرف الرابط بين الكهرباء وآظان المياه…اللبناني وحده بيعرف الرابط بين الطنجرة والإرسال …

واكيد اللبناني مافي غيره بالكون شاف البحر والجبل بظرف 20 دقيقة… وما في غيره وغير دبب القطب الجنوبي يللي شافو الثلج بالعالم…

اللبناني اينشتين زمانه وبطبيعته ورش وحربوق وإلا ما يجي نهار بطفولته وياكلها ضربة عا راسه… وهي كانت…