//Put this in the section

زبالة التاريخ – دينا الحجار

حاجي تحكوني عن لبنان الأخضر … يبس القش في!

حاجي تحكوني عن جبالو … عملتوهن  كسارات…




حاجي تحكوني عن ثلجو … داب…

حاجي تحكوني عن بحرو … جويتو …

حاجي تحكوني عن “حسن الضيافة” … شعبو نكد وبضل كاشش…

حاجي تحكوني عن الفول والحمص والتبولة … الشعب عم ياكل سوشي …

حاجي تحكوني عن الأخلاق … مافي…

حاجي تحكوني عن الوطنية… ماعم بقدر قول شي عن هيدي …

حاجي تحكوني عن الإستقلال… منو غير نهار فرصة بالسنة…

حاجي تحكوني عن طاولة حوار… الطاولة بدها أساس متين… طاولتكن ما إلها أساس…

حاجي تتحججو بحرب السبعين… دخيل الله خلصوني من حجتكن هاي, خلصت مدتها !!

حاجي تحكوني عن خطط أمنية فاشلة… الخطة الأمنية لازم تبلش من الحدود… علمونا بالمدرسة من زمان أنه منسكر الحنفية أول شي وبعدين منعالج العطل …

حاجي تحكوني عن “بدنا سلاح” و”لأ مابدنا سلاح”… فلقتونا…

حاجي تحكوني عن أهمية الحوار… فهمنا اهميته … المهم تتحاوروا  وتخلصونا…

في شي أهم نحكي عنو … بعطيكن خيارات : فينا نحكي عن الدولة الفارطة … فينا نحكي عن شعب أعمى… فينا نحكي عن حدود فالتة … فينا نحكي عن الكهرباء والمي والإنترنت والمواصلات… فينا نحكي عن المستشفيات التجارية… فينا نحكي عن المدارس التجارية… فينا نحكي عن الإعلام المسم… فينا نحكي عن الارهابيين يلي عم ينزرعوا ويفرخوا عنا… عن زبالة التاريخ يلي موجودة من قبل ويلي عم تنزت ببلدنا…اوسخ الخلائق عم تتكدس عنا متل جبال الزبالة…

كتير عليكن تتشبهوا بـالزبالة… الزبالة بالأساس نظيفة بس لما تتكدس بتوسخ… انتو أساسكن وسخ وعم تتكدسو عا جيّتكن … واللي في مسلة تحت باطو…