مسيحي ام مسلم؟ – ناتالي باهو


انت شو ؟؟مسلم، مسيحي، درزي، شيعي … وكل مرة بينسأل هالسؤال منسمع نفس الاجابة. وانا شو ؟؟





مسيحية . وهيدي انا كمان من دون ما فكّر بجاوب بنفس الطريقة . كل واحد منا خلق وتربّى حسب طايفة معينة. لما نخلق ما منختار طايفتنا.. منكبر ومنتربّى حسب اهلنا . كل اهل بربّو ولادن تربية دينن الصالحة، هيدا اللي تربّى بالكنيسة وهيداك بالجامع ، واللي حافظ الانجيل وغيرو حافظ القرآن وكل انسان بآمن على طريقته

انا بحترم كل الطوائف، صحيح كلنا عنا رب واحد وآله واحد بس كل واحد بطائفة معينة . هيك ربنا قسمنا .. وبالاخص بـ"لبنان" اللي هو بلد متعدد الطوائف وفي اكتر من 17 طائفة ومستحيل نجيب سيرة لبنان من دون ما نذكر هالعدد الكبير من الطوائف .

انا مسيحية. بعشق طايفتي.. بعشق الصليب والعدرا والمسيح. بحب الشعور لما كون بالكنيسة واسمع الصلوات وشم ريحة البخور وصوت الجرس. هيك انا تربّيت ومن اول ما بلشت احكي علمّوني قول " باسم الاب والابن والروح القدس" مع حركة الايدين الصحيحة "لصلّب ايدي على وجّي".
ومع الوقت وكل ما اكبر سنة صرت افهم اكتر واكتر واتعلم اكتر واكتر وبكل عيد ومع كل قدّيس صرت افهم وحب ديني كتير


بس في سؤال كبير دايما" بيخطر ببالي .. يا ترى لو انا كبرت وقررت غيّر ديني لأني تعرّفت على دين تاني، او لأني تعمّقت بدين تاني ولقيتو اقرب لقلبي ولروحي، حدا بحقّلو يعترض على هالشي ؟؟


لو انا اقتنعت بالقرآن اكتر من الانجيل، حدا بحقلّو يتدخل ويغيّرلي قناعتي؟؟ لو انا قرّرت صير مسملة واتحجب واتبع دين الاسلام، اهلي مسموح يعملوا ثورة عليّ ؟؟ لأ وألف لأ !!!


لا خوري ولا مطران ولا شيخ بحقلن يعترضوا. ولا حتى الاهل. شو ما كان دينك انت حر باختيارك ، حر انك تعتنق اي دين بدك . بتعرفوا ليه ؟؟
صحيح انو "ربنا" وزّع علينا اديان مختلفة بس ما جبرنا نضل على دينا

اللي عم بيصير واللي عم اسمعوا كتير استفزني حتى اكتب عن هالموضوع. ما حدا بحقّلوا يتدخل "بايمان" انسان تاني . كل انسان ان كان مؤمن او غير مؤمن، جواتو في ايمان بالفطرة . وايمانو هيدا بودّي على طريق هو بيختارا مش طريق خلقت معو .. من اهلو . هالاختلاف بالوجود بين كل الطوائف هو متعة بحد ذاتها، الاختلاف بالفكر والمظهر والثقافة والجهل حتى


انت ممنوع تحاكم او تمنع او تعارض اي انسان بموضوع الدين !! مسموح انك تنصح او تدافع يمكن عن دينك، هيدي حدودك . طالما "ربنا" راضي، انت يا انسان بأي حق بدك تعترض ؟!

وبالنهاية .. كل واحد على دينو الله يعينو ام بيصير فينا نقول يوما ما على دينو اللي اختارو؟
.